சனிப் பெயர்ச்சி பலன்கள் : சிம்மம்

சிம்மம்

simhamசிம்மம் (மகம், பூரம்,உத்திரம் முதல் பாதம் முடிய)

சனி பகவான் உங்கள் தைரிய ஸ்தானமான மூன்றாம் வீட்டிலிருந்து சுகஸ்தானமான நான்காம் வீட்டிற்குப் பெயர்ச்சி ஆகிறார்.

2015 ஆம் ஆண்டு ஜூலை மாதம் வரை உள்ள காலகட்டத்தில் புத்திசாலித்தனத்துடன் உங்கள் செயல்களைச் செவ்வனே செய்து முடித்து விடுவீர்கள். அக்கம் பக்கத்தாருடன் இருந்த அரசல் புரசல்கள் மறைந்து சுமுகமான சூழ்நிலை தென்படும். செய்தொழிலில் சிறப்பான வளர்ச்சியடையும். உங்களின் தனித்திறமை மேலோங்கும். ஆன்மீக ஈடுபாடு அதிகரிக்கும். குழந்தைகளையும் ஆன்மிகத்தில் ஈடுபடுத்துவீர்கள். அவர்களின் கல்வியிலும் வளர்ச்சியைக் காண்பீர்கள்.

உங்களின் ஆக்கப்பூர்வ யோசனைகளால் குடும்பத்திற்கு நன்மைகள் உண்டாகும். அறிவு சம்பந்தமான போட்டிகளிலும் கலந்து கொண்டு வெற்றி பெறுவீர்கள். அதேநேரம் அசையாச் சொத்துக்கள் வாங்கும்போது வில்லங்கம் இருக்கிறதா என்று ஒரு முறைக்கு இருமுறை தீர விசாரித்து வாங்கவும். மேலும் தாயின் ஆரோக்கியத்தில் உடனுக்குடன் கவனம் செலுத்துங்கள். அவரின் தேவைகளையும் அவர் மகிழ்ச்சியடையும் வகையில் பூர்த்தி செய்யுங்கள்.

2016 ஆம் ஆண்டு ஜூலை மாதம் வரையில் உள்ள காலகட்டத்தில் அனைத்துச் செயல்களும் சீராக நடந்தாலும் மனதில் இனம் புரியாத கலக்கம் இருந்தபடியே இருக்கும். அவசியமான தேவைகளுக்காக மட்டுமே கடன் வாங்கவும். எவருக்கும் உங்கள் பெயரில் கடன் வாங்கித் தரவேண்டாம். உங்கள் எதிரிகளின் கை ஒங்கும் என்பதால், பேச்சில் நிதானத்தைக் கடைபிடிக்கவும். மேலும் புதியவர்களை நண்பர்களாக ஆக்கிக் கொள்ள வேண்டாம். புதிய வாய்ப்புகளை அனுபவஸ்தர்களின் ஆலோசனைக் கேட்டு அதற்கேற்றாற்போல் பயன்படுத்திக் கொள்ளவும்.

2017 ஆம் ஆண்டு அக்டோபர் மாதம் வரையில் உள்ள காலகட்டத்தில் பொது வாழ்வில் ஈடுபட வாய்ப்புகள் கிடைக்கும். உயர்ந்தவர்களின் நட்பு உங்களுக்கு உந்து சக்தியாக அமையும். சமூக விழாக்களில் மதிப்புடன் நடத்தப்படுவீர்கள். இதுவரை செல்லாத புனிதத் தலங்களுக்கு யாத்திரை செல்வீர்கள். பூர்வீக சொத்துக்களில் இருந்த சிக்கல்கள் விலகி பாகப்பிரிவினை சுமுகமாக நடக்கும். ஆடை ஆபரணச் சேர்க்கைகள் உண்டாகும். பாதியில் கட்டி நிறுத்தப்பட்டிருந்த வீட்டைக் கட்டி முடித்து கிரகப் பிரவேசம் நடக்கும் காலகட்டமாக இது அமைகிறது என்றால் மிகையாகாது.

உத்தியோகஸ்தர்கள் திட்டமிட்ட பணிகளை உடனுக்குடன் முடிக்கும் திறமைகளைப் பெறுவார்கள். அதேசமயம் மேலதிகாரிகளின் ஆதரவு சுமாராகவே கிடைக்கும் என்பதால் எதிர்பார்த்த பதவி உயர்வு, ஊதிய உயர்வு இவைகள் தள்ளிப்போகலாம். அதனால் எந்நேரமும் காரியங்களில் கண்ணும் கருத்துமாக இருந்து செய்துவரவும். உடன் பணிபுரியும் ஊழியர்களிடம் நட்புடன் பழகுவீர்கள்.

வியாபாரிகளுக்கு இந்த சனிப்பெயர்ச்சியின் கடைசி பகுதியில் சிறு சிரமங்கள் ஏற்படும். மேலும் கூட்டாளிகளுடன் சிறு மனக்கசப்புகளும் உண்டாகலாம். இதனால் இந்த காலகட்டம் முழுவதும் உங்கள் மனதில் உள்ள விஷயங்களை எவரிடமும் முழுமையாகப் பகிர்ந்து கொள்ள வேண்டாம். மற்றபடி வியாபாரத்தைப் பெருக்குவதற்கு புதிய வாகனங்களை வாங்குவீர்கள். பழைய பாக்கிகளும் வசூலாகி பொருளாதாரம் மேம்பாடு அடையும்.

விவசாயிகளுக்கு மகசூல் நன்றாக இருக்கும். புதிய கழனிகளை வாங்குவீர்கள். மற்றபடி கால்நடைகளுக்கும் புழு பூச்சி ஒழிப்புக்கும் சற்று செலவு செய்ய நேரிடும். நீர்பாசனத் துறையில் உங்களால் ஆன உதவிகளைச் செய்வீர்கள்.

அரசியல்வாதிகள் அனைத்துச் செயல்களிலும் வெற்றி பெற்றாலும் கட்சி மேலிடத்தின் அதிருப்திக்கு சிறிது ஆளாக நேரிடலாம். மற்றபடி சமூகத்தில் உங்கள் மதிப்பு மரியாதை உயரும். இறுக்கமான சூழ்நிலைகளிலிருந்து விடுபடுவீர்கள். வளர்ச்சிக்கான திட்டங்களைத் தீட்டுவீர்கள். தொண்டர்கள் உங்கள் பேச்சைக் கேட்டு நடப்பார்கள். உங்களின் சேவையை தொண்டர்கள் விரும்புவார்கள்.

கலைத்துறையினரின் வாழ்க்கையில் இருந்த தேக்க நிலையில் சிறிது சிறிதாக முன்னேற்றங்கள் தென்படும். அதேசமயம் சிலர் அவதூறு சம்பந்தப்பட்ட வழக்குகளையும் சந்திக்க நேரிடும். எனவே மற்றவர்களை புண்படுத்தாமல் பேசவும். கிடைத்த வாய்ப்புகளை நன்கு பயன்படுத்திக் கொண்டு செயல்படவும். எதிர்பார்த்த பணமும் புகழும் கிடைக்க தாமதமாகலாம். பொறுமையுடனும் நம்பிக்கையுடனும் பணியாற்றினால் வெற்றி நிச்சயம்.

பெண்மணிகள் குடும்பத்தினரிடம் விட்டுக் கொடுத்து சுமுக நிலையை உண்டாக்கவும். வீண் வாக்குவாதங்களில் ஈடுபடாதீர்கள். மற்றபடி பெரியோர்களின் ஆசியும் கணவரின் ஆதரவும் இந்த காலகட்டம் முழுவதும் கிடைக்கும்.

மாணவமணிகள் மனதில் இருந்த சலிப்புகள் நீங்கி உற்சாகத்துடன் காணப்படுவார்கள். படிப்பில் அதிக கவனம் செலுத்துவீர்கள். மேலும் பாடங்களை மனதில் நிறுத்திக் கொள்ளும் முறையை செம்மை படுத்திக் கொள்ளுங்கள். மற்றபடி உள்ளரங்கு விளையாட்டுகளில் அதிக கவனம் செலுத்துங்கள். சக மாணவர்களையும் அனுசரித்து செல்லவும்.

பரிகாரம்: விநாயகப் பெருமானை வழிபட்டு வரவும்.

Previous Post
Next Post