சனிப் பெயர்ச்சி பலன்கள் : மகரம்

மகரம்

makaramமகரம் (உத்திராடம் 2-ம் பாதம் முதல் திருவோணம், அவிட்டம் 2-ம் பாதம் முடிய)சனிபகவான் உங்களின் தொழில் ஸ்தானமான பத்தாம் ராசியிலிருந்து பதினொன்றாம் ராசியான லாப ஸ்தானத்தில் சஞ்சரிக்கத் தொடங்குகிறார்.

2015 ஆம் ஆண்டு ஜூலை மாதம் வரையில் உள்ள காலகட்டத்தில் பொருளாதாரம் சிறப்பாக இருக்கும். நெருங்கியவர்களுக்கு தேவையான உதவிகளைச் செய்வீர்கள். உங்களின் வாழ்க்கைத் திறம்பட வளரும். பொதுச்சேவையில் இருப்பவர்களுக்கு சமூகத்தில் அந்தஸ்தான பதவிகள் கிடைக்கும். எதிலும் தனித்து நின்று போராடி வெற்றி பெறுவீர்கள். குடும்பத்தில் மழலை பாக்கியம் உண்டாகும். உங்களின் பொறுப்புகளை புரிந்து கொண்டு திட்டமிட்டு உழைப்பீர்கள். குடும்பத்தினருடன் விருந்து கேளிக்கைகளில் கலந்து கொள்வீர்கள். உங்கள் லட்சியங்கள் நிறைவேறும் காலகட்டமாக இது அமைகிறது என்றால் மிகையாது.

2016 ஆம் ஆண்டு ஜூலை மாதம் வரையில் உள்ள காலகட்டத்தில் செய்தொழிலுக்கு முதலீடு செய்ய முடியாமல் திணறிக் கொண்டிருந்தவர்களுக்கு வங்கிகளிடமிருந்து கடன்கள் கிடைத்துவிடும். நண்பர்கள் கூட்டாளிகளுடன் இணக்கமாகப் பணியாற்றுவீர்கள். புதிதாக வண்டி வாகனங்கள் வாங்குவீர்கள். மனதிலிருந்த பயங்கள் மறைந்து தைரியங்கள் கூடத்தொடங்கும். உங்களுக்குக்கீழ் வேலை பார்ப்பவர்களுடன் சமரசமாக விட்டுக் கொடுத்து நடந்து கொள்வீர்கள். போட்டிகளைச் சுலபமாகச் சமாளிப்பீர்கள். வருமானம் இரட்டிப்பாக இருப்பதால் புதிய சேமிப்புத் திட்டங்களில் சேர்வீர்கள். எதிலும் நீதி நேர்மை என்று கொள்கையை பகுத்துக் கொண்டு சிறப்பாகப் பணியாற்றும் காலகட்டமாக இது அமைகிறது என்றால் மிகையாகாது.

2017 ஆம் ஆண்டு அக்டோபர் மாதம் வரையில் உள்ள காலகட்டத்தில் பெற்றோருடன் அனுசரித்து நடந்து கொண்டு அவர்களின் ஆதரவைப் பெறுவீர்கள். குடும்பத்தாருடன் மனதிற்கினிய பயணங்களையும் மேற்கொள்வீர்கள். புதிய தொழில் நுட்பங்களைத் தெரிந்து கொள்வீர்கள். தொழிலும் இடையூறு எதுவும் இல்லாமல் சீராகவே நடைபெறும். பூர்வீகச் சொத்துக்களின் பேரில் உள்ள வழக்குகள் தீரும். அதேநேரம் எவருக்கும் உங்கள் பெயரில் கடன் வாங்கிக் கொடுக்க வேண்டாம். மேலும் எவருக்கும் முன் ஜாமின் போடுவதோ வாக்கு கொடுப்பதோ கூடாது. மேலும் எவரிடமும் உங்கள் ரகசியங்களைப் பகிர்ந்துக் கொள்ள வேண்டாம். மற்றபடி அறச்செயல்களும் ஆன்மிக வழிபாடுகளும் உங்களை கஷ்டங்களிலிருந்து காத்து நிற்கும் காலமாக இது அமைகிறது.

உத்தியோகஸ்தர்களுக்கு பதவி உயர்வு கிடைக்கும். மேலதிகாரிகளிடம் கொண்டுள்ள நட்புறவு படிப்படியாக வளரும். வருமானமும் கூடத்தொடங்கும். நெடுநாட்களாக எதிர்பார்த்திருந்த இடமாற்றம் கிடைக்கும். வீடு, வாகனம் வாங்க கொடுத்திருந்த விண்ணப்பங்கள் பரிசீலிக்கப்பட்டு கடன்கள் கிடைக்கும். அதேநேரம் அதிகமாக உழைக்க நேரிடும். அதனால் பதற்றப்படாமல் நிதானமாகப் பணியாற்றுங்கள்.

வியாபாரிகள் புதிய வியாபார ரகசியங்களைக் கற்றுக்கொள்வார்கள். புதிதாக வியாபாரம் அல்லது தொழில் தொடங்குவார்கள். கூட்டாளிகளிடம் இணக்கமாக நடந்து கொள்வார்கள். அதேசமயம் வீண் ஆசாபாசங்களை வளர்த்துக் கொள்ளவேண்டாம். பொருள்களை கடனுக்கு விற்பனை செய்ய வேண்டாம்.

விவசாயிகளுக்கு விளைச்சல் அதிகரிக்கும். புழு பூச்சிகளால் ஏற்படும் பாதிப்பும் குறைவாகவே இருக்கும். உங்களுக்கு கீழ் பணிபுரிபவர்களிடம் அக்கறையாக நடந்து கொண்டால் மேலும் நன்மை அடையலாம். உங்களின் பழைய கடன்கள் வசூலாகும். புதிய விவசாய உபகரணங்களையும் வாங்குவீர்கள்.

அரசியல்வாதிகள் பொதுச்சேவையில் அனுகூலமான திருப்பங்களைக் காண்பார்கள். கட்சி மேலிடத்தின் பாராட்டுகளைப் பெறுவார்கள். இதனால் புதிய பதவிகள் உங்களைத் தேடி வரும். எதிரிகளும் உங்களிடம் அடங்கி நடப்பார்கள். மக்களின் ஆதரவு உங்களுக்கு எதிர்பார்த்த அளவுக்கு கிடைத்து உங்களை மகிழ்ச்சியில் ஆழ்த்தும்.

கலைத்துறையினருக்கு திருப்திகரமான ஒப்பந்தங்கள் கிடைக்கப்பெறும். வருமானம் எதிர்பார்த்த அளவில் இருக்கும். கடுமையாக உழைப்பார்கள். மற்றபடி புகழைத் தக்கவைத்துக் கொள்வீர்கள். சக கலைஞர்களின் ஆதரவுடன் கலைப்பயணங்களைச் செய்வீர்கள். சிறப்பு விருந்தினர் அந்தஸ்து கிடைத்து உங்கள் அந்தஸ்து உயரும்.

பெண்மணிகளுக்கு கணவருடன் நிலவிய கருத்து வேறுபாடுகள் மறையும். குடும்பத்தில் சந்தோஷம் நிறையும். உங்களின் பொறுப்பை சரியான முறையில் நிறைவேற்றுவீர்கள். உடன்பிறந்தோருக்குக்கிடையே இருந்த பிணக்குகள் நீங்கும். சிற்சில உடலுபாதைகள் உண்டானாலும் அதனால் பெரிதாக பாதிப்புகள் ஏற்படாது மற்றபடி தெய்வ வழிபாட்டையும் கூட்டிக் கொள்வீர்கள்.

மாணவமணிகளுக்கு ஞாபக சக்தி அதிகரிக்கும். அதிக மதிப்பெண்களைப் பெற்று முதல் மாணாக்கராக வருவீர்கள். சிறப்பு உடற்பயிற்சிகளை மேற்கொண்டு மனதில் உற்சாகத்தைப் பெறுவீர்கள். பெற்றோரின் ஆதரவு குறைவாக இருப்பதால் அவர்களிடம் பெரிய கோரிக்கைகள் எதையும் கொண்டு செல்ல வேண்டாம்.

பரிகாரம்: திருவேங்கடவனை வழிபட்டு வரவும்.

Previous Post
Next Post