astrology dinamani
குருப் பெயர்ச்சி பலன்கள் 2017: ரிஷபம்
2015/07/03

(கார்த்திகை 2, 3, 4-ம் பாதங்கள், ரோகிணி, மிருகசீரிஷம் 1, 2-ம் பாதங்கள்)

ராசிக்கு இரண்டில் ராசிநாதன் சுக்கிரன். சுக்கிரனுக்கு குரு பார்வை வேறு. ஆக, வேலை தேடும் முயற்சியில் இருப்போருக்கு இந்த செப்டம்பர், அக்டோபர் மாதங்கள் மிக அனுகூலமானவை. இந்த மாதங்களில் எந்தக் காரியத்தையும் துணிவோடு எதிர்கொள்வீர்கள்.

இளைய சகோதரத்துடன் மனவேற்றுமை உண்டாகும் காலம் இது. ஆக, மிக எச்சரிக்கையுடன் நடந்துகொள்ளுங்கள். வீடு, வாசல் வாங்க அல்லது கட்ட நினைப்பவர்களுக்கு இந்த மாதங்கள் மிக அனுகூலமானவை. நீங்கள் முயற்சி செய்யலாம். உங்கள் முயற்சி பலிதமாகும்.

அக்டோபர், நவம்பர் மாதங்களில் உங்கள் குழந்தைகள் உடல் நலம் பாதிக்கப்படும் கிரகநிலைகள் காணப்படுகிறது. இந்த ஆண்டுக் கடைசியில் ராசி அதிபதி சுக்கிரன் 6-ம் இடத்தில் சஞ்சாரம் செய்கிறார். அதனால் உங்கள் உடல் நலம் பாதிக்கப்படக்கூடிய சூழ்நிலை ஏற்படும். லாபாதிபதியான குருவும் உடன் இருப்பதனால், உடல்நிலை தேறிவிடும். கவலை எதுவும் பட வேண்டாம். டிசம்பர், ஜனவரி மாதங்களில் 6-ம் வீட்டு அதிபதி 7-லும், 7-ம் வீட்டு அதிபதி ஆறாம் வீட்டிலும் பரிவர்த்தனை இருப்பதால், மனைவியின் உடல் நிலை பாதிப்புக்குள்ளாகும்.

இந்தப் பெயர்ச்சியில், குரு இந்த ராசிக்காரர்களுக்கு 6-ம் இடத்தில் இந்த ஆண்டு முழுதும் சஞ்சாரம் செய்கிறார். “6-ல் குரு ஊரில் பகை” என்பது பெரியோர் வாக்கு. நீங்கள் நிதானத்தைக் கையாள வேண்டிய காலம் இது. 6-ம் இடம் மறைவு ஸ்தானம் மட்டுமல்ல; நீங்கள் வேலை பார்க்கும் இடத்தையும் குறிக்கிறது. அங்கு குரு இருப்பதால், தொழிலில் உயர்வு ஏற்படக்கூடும். சிலருக்கு தூரத்து இடங்களுக்கு இடமாற்றமும் ஏற்படும். தகப்பனாருடன் நல்லுறவு இல்லாதவர்களுக்கு 2018-ம் ஆண்டு ஜனவரி, பிப்ரவரி மாதங்களில் உறவு சீரடையும்.

2018 மார்ச், ஏப்ரல் மாதங்கள் உங்களுக்கு மிக அனுகூலமான மாதங்கள். உங்கள் முயற்சி நல்ல முறையில் முடியும். தொழில் செய்யும் இடத்தில் நல்ல மதிப்போடு இருப்பீர்கள். மேல் அதிகாரிகளின் ஒத்துழைப்பு உங்களுக்குக் கிட்டும். சிலருக்குப் பதவி உயர்வுக்கும் வழி உண்டு. சித்திரை, வைகாசி மாதங்கள் கலைஞர்களுக்கு உயர்வைக் கொடுக்கும் மாதம்.

Previous Post
Next Post