astro_dinamani
குருப் பெயர்ச்சி பலன்கள் 2017: மீனம்
2015/07/03

(பூரட்டாதி 4-ம் பாதம், உத்திரட்டாதி, ரேவதி)

மீன ராசிக்கு அதிபதி குரு; தனுர் ராசிக்கும் அதிபதி குருதான். அதாவது, ஒன்றுக்கும், பத்துக்கும் அதிபதி குருதான். அவர் அஷ்டமஸ்தானத்தில் சஞ்சாரம் செய்கிறார். அஷ்டமஸ்தானம் என்றால் பயந்துவிட வேண்டாம். 8-ம் இடம் என்பது 7-ம் இடத்துக்கு 2-ம் இடம் ஆகும். 7-ம் இடம் ஒருவரின் வாழ்க்கைத் துணையைக் குறிக்கிறது. வாழ்க்கைத் துணையின் தனஸ்தானம்தான் 8-ம் இடம். அதில் குரு இருந்தால் வாழ்க்கைத் துணையின் பொருளாதாரம் உயரும். வேலை இல்லாதோருக்கு வேலை கிட்டும். வேலையில் இருப்போருக்கு பதவி உயர்வு கிடைக்கும்.

அடுத்ததாக 7-ம் இடம் என்பது கூட்டு வியாபாரம் செய்வோரின் பங்குதாரரைக் குறிக்கிறது. அதேபோல், பங்குதாரரின் பொருளாதாரம் உயரும். குருவின் பார்வையைப் பார்க்கும்போது, 12-ம் இடம் 2-ம் இடம், 4-ம் இடம் ஆகியவை குருவின் பார்வையைப் பெருகின்றன. 12-ம் இடம் விரயஸ்தானம் என்றழைக்கப்பட்டாலும், அதுவே முதலீடு செய்கின்ற வீடாகவும் ஆகின்றது. ஆக, இந்த ராசிக்காரர்கள் தங்கள் பணத்தை பல வழிகளில் முதலீடு செய்வார்கள். பொருள்கள் வாங்கும்போது நல்ல முறையில் செலவு செய்வார்கள்.

அடுத்ததாக, 2-ம் இடத்துக்கு குரு பார்வை கிடைக்கிறது. 8-ம் இடம் என்பது பிதுரார்ஜித சொத்துகளைக் குறிக்கிறது. ஆக, இந்த ராசிக்காரர்களுக்கு பிதுரார்ஜித சொத்துகளிலிருந்து தன வரவுக்கு யோகம் இருக்கிறது. அதேபோல், ஒருவருடைய பிஎஃப்., கிராஜுவிடி போன்றவற்றையும் 8-ம் வீடு குறிக்கிறது. ஆக, இவற்றில் இருந்து பணம் எதிர்பார்ப்பவர்களுக்கு அவை நிச்சயமாக வந்து சேரும்.

அடுத்ததாக 4-ம் இடத்துக்கு குருவின் பார்வை. 4-ம் இடம் ஸ்திர சொத்துகளைக் குறிக்கிறது. ஆக, ஸ்திர சொத்துகள் வாங்கும் யோகமும் இந்த ராசிக்காரர்களுக்கு இருக்கிறது. படிக்கும்
மாணவர்களுக்கும் இந்த ஓராண்டு அனுகூலமாகவே காணப்படுகிறது.

சனியானவர் இன்னும் இரண்டு மாதத்தில் 10-ம் இடத்துக்கு வருகிறார். அப்போது செய்யும் தொழிலில் பிரச்னைகள் தோன்றும். சக ஊழியர்கள், உங்கள் கீழ் வேலை செய்பவர்கள் இவர்களால் பல பிரச்னைகள் வரலாம். இவற்றை எல்லாம் சமாளிக்க சனிப்ரீதி செய்துகொள்வது நன்மையைக் கொடுக்கும். திருநள்ளாரோ அல்லது குச்சனூரோ சென்று சனி பகவானை வணங்கி பரிகாரம் செய்துகொள்ளலாம்.
*
இதுவரையில் 12 ராசிக்கும் உண்டான பலன்களைப் பார்த்தோம். இவை எல்லாம் பொதுப் பலன்களே. அவரவர் ஜாதகத்தின்படியும், நடப்பு தசா, புக்தியின்படியும்தான் பலன்கள் நடைபெறும். ஒன்பது கிரகங்களுக்கும் வழிபட “கோளறு பதிகம்” என்ற ஸோகத்தை தினமும் பாராயணம் செய்வது மிக நல்லது. இது திருஞானசம்மந்தரால் இயற்றப்பட்டது.

ஜோதிடரத்னா சோ. சந்திரசேகரன்

Previous Post
Next Post