astro_dinamani
குருப் பெயர்ச்சி பலன்கள் 2017: சிம்மம்
2015/07/03

(மகம், பூரம், உத்திரம் 1-ம் பாதம்)

குருப் பெயர்ச்சியின்போதே ஜென்ம ராசியில் சூரியனும், புதனும் சேர்ந்து இருக்கிறார்கள். ராசி அதிபதியும், தன, லாபாதிபதியான புதனும் சேர்ந்து இருப்பது மிக நல்லதன்றோ! ஆவணி, புரட்டாசி மாதங்கள் இந்த ராசிக்காரருக்கு பல நன்மைகளைக் கொடுக்கக்கூடியது.

இந்த ஆண்டு ஐப்பசி மாதம் முடிய சனி பகவான் விருச்சிகத்திலேயே சஞ்சரிப்பதால், வெளியூரில் உத்தியோகத்தில் பணிபுரிபவர்கள் சொந்த ஊருக்கு இடம் பெயர விரும்பினால், அதற்கான முயற்சியில் ஈடுபடலாம். உங்கள் முயற்சி பலிதமாகும்.

புதுவீடு வாங்க விழைவோர் செப்டம்பர், அக்டோபர் மாதங்களில் அதற்கான முயற்சியில் ஈடுபடலாம். வெளிநாட்டுத் தொடர்பு மூலம் சிலருக்குப் பணம் பெறும் யோகமும் இருக்கிறது. நவம்பர், டிசம்பர் மாதங்களில் உள்ள கிரக நிலையைப் பார்க்கும்போது வேலை தேடும் படலத்தில் இருப்போருக்கு வேலை கிடைக்கக்கூடிய வாய்ப்புகள் இருக்கின்றன. 8-ம் வீட்டு அதிபதியான குரு 3-ம் வீட்டில் ஓராண்டு இருப்பதால் அண்டை, அயலாருடன் பிரச்னைகள் வருவதற்கு சாத்தியக்கூறுகள் உள்ளன. அதேபோல், வெளியூர்ப் பயணத்தின்போதும் விபத்துகள் ஏற்படக்கூடிய சூழல் காணப்படுகிறது.

படிக்கும் மாணவர்கள் இந்த ஆண்டு இறுதி முடிய அதிக கவனம் செலுத்துவது நன்று. 4-ம் இடத்தில் 6-ம் வீட்டுக்குரிய சனி இருப்பதால், படிப்பில் இடையூறுகள் வரக்கூடும். அவற்றைத் தவிர்க்க படிப்பில் அதிக கவனம் செலுத்துவது இன்றியமையாதது. அக்டோபர் மாதம் சனியானவர் விருச்சிகத்திலிருந்து தனுசுக்கு பெயர்கிறார். அங்கு இரண்டரை ஆண்டுகள் தங்கி இருப்பார். குழந்தை பாக்கியம் இல்லாதவர்களுக்கு தாமதமாகத்தான் குழந்தை பிறக்கும். இருக்கும் குழந்தைகளுக்கும் உடல் நலம் பாதிப்புக்குள்ளாகும்.

தை மாதத்தில் ராசி அதிபதியாகிய சூரியன், 6-ம் இடத்தில் சஞ்சாரம் செய்வதால் உடல்நிலை பாதிப்புக்குள்ளாகும். செவ்வாயின் பார்வையையும் சூரியன் பெறுவதால் சிறு விபத்துகள் ஏற்படக்கூடும். மார்ச், ஏப்ரல் மாதங்களில் வேலை தேடும் படலத்தில் இருப்போருக்கு வேலை கிடைக்கும். ஏப்ரல், மே மாதங்களில் இந்த ராசிக்காரர்களுக்கு வெளிநாடு செல்லும் யோகமும் உள்ளது. படிக்கும் மாணவர்கள் மார்ச், ஏப்ரல் மாதங்களில் அதிக கவனம் செலுத்த வேண்டியது அவசியம்.

Previous Post
Next Post