astro_dinamani
குருப் பெயர்ச்சி பலன்கள் 2017: கும்பம்
2015/07/03

(அவிட்டம் 3, 4-ம் பாதங்கள், சதயம், பூரட்டாதி 1, 2, 3-ம் பாதங்கள்)

ஜென்ம ராசிக்கே குருவின் பார்வை; அதைத்தவிர 3-ம் இடம், 5-ம் இடத்துக்கு குருவின் பார்வை. குரு 9-ம் இடத்திலிருந்து மேற்படி வீடுகளைப் பார்க்கிறார். ஜென்ம ராசியான கும்பத்தைப் பார்ப்பதனால், குரு அனுக்கிரகம் ஏற்படுகிறது. எடுத்த காரியத்தில் வெற்றியும் காரிய சித்தியும் ஏற்படும்.

குரு இவ்வளவு நாளாக அஷ்டமஸ்தானமான கன்னியில் இருந்து பல துன்பங்களைக் கொடுத்து வந்தார். இந்தப் பெயர்ச்சி மூலம் பாக்கியஸ்தானத்துக்குப் பெயர்ந்து பல நல்லவற்றைக் கொடுக்க இருக்கிறார். பணப் புழக்கம் அதிகரிக்கும்.

இந்த ராசிக்கு தனாதிபதியாகவும், லாபாதிபதியாகவும் உள்ள குரு உங்கள் ஜென்ம ராசியைப் பார்ப்பது உங்கள் அதிர்ஷ்டமன்றோ. 9-ம் இடம் என்பது தகப்பனாரைக் குறிக்கிறது. அயல்நாட்டுத் தொடர்புகளைக் குறிக்கிறது. ஆக, இந்த ராசிக்காரர்களுக்கு தகப்பனார் மூலம் அல்லது தகப்பனாரைச் சேர்ந்தவர்கள் மூலம் பண வரவு காணப்படுகிறது. பண வரவு மட்டும் அல்ல; நிறைந்த ஆதாயமும் தென்படுகிறது. அதேபோல், வெளிநாட்டுத் தொடர்பு மூலம் சிலருக்குப் பண ஆதாயம் காணப்படுகிறது. சிலருக்கு வெளிநாடுகளில் வேலையும் கிடைக்கலாம்.

மூன்றாம் இடம் என்பது நம் ஸ்திர சொத்துகளை விற்கும் வீடு. அதற்கு குரு பார்வை இருப்பதால், ஸ்திர சொத்துகளை விற்க விரும்புவோர், இந்த கிரக நிலையைப் பயன்படுத்திக்கொண்டு நல்ல லாபத்துக்கு விற்கலாம். இளைய சகோதரத்தின் மூலமாகவும் சிலருக்கு ஆதாயம் கிடைக்கும். அடுத்தது ஐந்தாம் வீடு, புத்திர பாக்கியம் இல்லாதவர்களுக்கு புத்திர பாக்கியம் ஏற்படக்கூடும். சிலர், கோவில்களுக்கு புனிதப் பயணம் மேற்கொள்வர்.

நோய், நொடியினால் அவதிப்பட்டு வந்தவர்களுக்கு நிவாரணம் கிடைக்கும். அதாவது, இது நோய்கள் குணமாகக்கூடிய காலம். குரு வக்கிரமாக உள்ள காலங்களில் நல்ல பலன்கள் சற்றுக் குறைந்தே காணப்படும். அப்போது குரு பகவானை வியாழக்கிழமைகளில் வணங்கிவந்தால், அது ஒரு பரிகாரமாக இருக்கும். குரு காயத்ரியை நாள்தோரும் மூன்று முறை சொல்லி வந்தால் அது ஒரு பரிகாரமாக இருக்கும்.

குரு காயத்ரி
“ஓம் வ்ருஷபத் வஜாய வித்மஹே
க்ருணி ஹஸ்தாய தீமஹி
தந்நோ குரு ப்ரசோதயாத்”

Previous Post
Next Post