குருப் பெயர்ச்சி பலன்கள் 2017: கன்னி

கன்னி (உத்திரம் 2-ம் பாதம் முதல் அஸ்தம், சித்திரை 2-ம் பாதம் முடிய)

இந்த குருப்பெயர்ச்சி காலத்தில் இந்த ஆகஸ்டு மாதம் முதல் 2017 ஜனவரி மாதம் வரை உள்ள காலகட்டத்தில் உங்கள் தோற்றத்தில் பொலிவு கூடி மிடுக்குடன் நடப்பீர்கள். பொருளாதாரமும் குடும்ப நிலைமையும் மேம்பட்ட நிலையில் இருக்கும். இதுவரை உங்களை சிக்கலுக்கு உள்ளாக்கி இருந்த அனைத்து விஷயங்களும் இனிமேல் முடிவுக்கு வரத்தொடங்கும். உங்கள் புத்திசாலித்தனத்தால் எதையும் சமாளித்து விடுவீர்கள். மனதில் தைரியம் பிறக்கும். கடுமையான கஷ்டங்களை அனுபவித்து கலங்கிப் போயிருந்தவர்கள் மகிழ்ச்சியைக் காணத்துவங்குவார்கள்.

மேலும் தந்தை வழி உறவினர்களால் கருத்து வேறுபாடுகள் உண்டாகும். அதனால் அனாவசியப் பேச்சு வேண்டாம். சிலருக்கு நன்றாகப் பழகியவர்களே எதிரியாகும் அமைப்பு இருப்பதால் வாக்குவாதங்கள் ஏற்படாமல் பார்த்துக் கொள்ளுங்கள். தொலைதூரத்திலிருந்து வரும் செய்திகள் நல்ல செய்திகளாக வரும். குழந்தைகளும் மகிழ்ச்சிகரமான நிலைமையில் இருப்பார்கள். அவர்களுக்கு சுபகாரியங்கள் நடக்க எடுக்கும் முயற்சிகள் இந்த காலகட்டத்தில் வெற்றிபெறும்.

அடுத்த ஆண்டு பிப்ரவரி மாதத்திலிருந்து ஆகஸ்டு மாதம் வரை உள்ள காலகட்டத்தில் பழைய வாகனங்களை விற்றுவிட்டு புதிய வாகனங்களை வாங்குவீர்கள். பணவரவில் இதுவரை இருந்த தடைகள் நீங்கும். மேலும் எதிர்பாராத வகையில் வருமானங்கள் வரத்தொடங்கும். திடீர் அதிர்ஷ்ட வாய்ப்புகளும் தேடி வரும். பழைய கடன்களை அடைப்பீர்கள். சிலருக்கு வெளிநாட்டுப் பயணமும் அமையும். அரசுத்துறையில் அதிகாரம் படைத்தவர்கள் உங்களுக்கு நண்பர்களாவார்கள். வாழ்க்கை தெளிந்த நீரோடைப்போல் செல்லும் காலகட்டமிது. புதிய நீண்டகால சேமிப்புத் திட்டங்களில் சேர்வீர்கள். மேலும் சமுதாயப் பொதுக் காரியங்களிலும் உங்களை ஈடுபடுத்திக் கொண்டு உங்கள் பெயர் புகழ் உயரக் காண்பீர்கள் என்றால் மிகையாகாது.

உத்தியோகஸ்தர்கள் அலுவலகப் பணிகளில் கவனத்துடன் செயல்படவும். உங்களுக்கு மேலதிகாரிகளின் அன்பும் ஆதரவும் கிடைக்குமென்றாலும் சில நேரங்களில் நீங்கள் பேசும் வார்த்தைகளால் முன்னேற்றம் அடைவதில் காலதாமதம் ஏற்படும். எனவே பேச்சில் எச்சரிக்கை தேவை. சிலருக்கு விரும்பிய இடமாற்றம் கிடைக்கும். சக ஊழியர்கள் நட்புடன் பழகுவார்கள். பணவரவு சரளமாக இருக்கும். புதிய சேமிப்புகளில் ஈடுபடுவீர்கள். வியாபாரிகள் புதிய முதலீடுகளைத் தவிர்க்கவும். கவனத்துடன் செயல்பட்டு வியாபாரத்தைப் பெருக்கவும். நண்பர்களையோ, கூட்டாளிகளையோ நம்பி எதையும் பேசவோ செய்யவோ வேண்டாம். கடையை சீரமைக்கும் எண்ணத்தை ஒத்தி வையுங்கள். புதிய விற்பனை பிரதிநிதிகளை அமர்த்தி, உங்கள் பொருள்களை பல புதிய சந்தைகளுக்குக் கொண்டு சென்று விற்பனையை அதிகரிக்கவும்.

விவசாயிகளுக்கு மகசூல் நன்றாகவே இருக்கும். மேலும் விவசாயப் பணியாளர்களிடம் விட்டுக்கொடுத்துச் செல்லவும். வீணாக வரப்பு வாய்க்கால் சண்டைகளில் இறங்க வேண்டாம். கால்நடைகளாலும் லாபம் கிடைக்கும். புதிய கழனிகளை வாங்கி விவசாயத்தை விரிவு படுத்துவீர்கள். மேலும் முக்கிய முடிவுகள் எடுக்கும் நேரங்களில் அனுபவஸ்தர்களின் ஆலோசனையைப் பெற்று நடக்கவும். வீண்விரயங்களைத் தவிர்க்கவும்.

அரசியல்வாதிகள் தங்கள் எண்ணங்களைச் செயலாக்க எடுக்கும் முயற்சிகள் தோல்வியடையும். உட்கட்சிப் பூசலில் மாட்டிக்கொள்ள வேண்டாம். தொண்டர்களை அனுசரித்துச் செல்லவும். அவர்களின் தேவைகளைப் பூர்த்தி செய்யவும். கலைத்துறையினருக்கு எதிர்பார்த்த பாராட்டுகள் தேடி வரும். உங்களின் கடமைகளைச் சரிவரச் செய்யுங்கள். சில கலைஞர்களுக்கு திடீரென்று பெரிய ஒப்பந்தங்களில் கையெழுத்திடும் அதிர்ஷ்டம் கிடைக்கும். ரசிகர்களின் ஆதரவு கிடைத்துக்கொண்டே இருக்கும். பெண்மணிகளுக்கு கணவன் மனைவி உறவுநிலை சுமாராகவே இருக்கும். குழந்தைகளுக்கு நன்மைகள் உண்டாகி உங்களை மகிழ்ச்சிக் கடலில் ஆழ்த்தும். மாணவமணிகள் நல்ல மதிப்பெண்களை அள்ளுவார்கள். கல்வியிலிருந்த மந்த நிலை விலகி படிப்பில் முன்னேற்றம் ஏற்படும். விளையாட்டுகளில் ஈடுபடும் மாணவர்கள் விருதுகளையும் பாராட்டையும் பெறுவார்கள். எனினும் தொடர்ந்து வெற்றிபெற விடா முயற்சியும் நம்பிக்கையும் உங்களுக்கு அவசியம்.

பரிகாரம்: ஸ்ரீ ராதாகிருஷ்ணரை வழிபட்டு வரவும்.

Previous Post
Next Post