astro_dinamani
குருப் பெயர்ச்சி பலன்கள் 2017 : கடகம்
2014/07/03

(புனர்பூசம் 4-ம் பாதம், பூசம், ஆயில்யம்)

ஜென்ம ராசியில் செவ்வாய், ராகு செப்டம்பர் மாதத்தில் சஞ்சாரம் செய்கிறார்கள். அப்போது உடலில் காயம் ஏற்படக்கூடிய சாத்தியக்கூறு இருக்கிறது. அதற்குப் பிறகு செவ்வாயும், சுக்கிரனும் சிம்மத்தில் சஞ்சாரம் செய்கிறார்கள். 10-க்கு உடையவனும், 11-க்கு உடையவனும் தனஸ்தானத்தில் சஞ்சாரம் செய்வதால், வேலை தேடும் படலத்தில் இருப்போருக்கு வேலை கிடைக்கக் கூடிய வாய்ப்பு ஏற்படுகிறது.

சிலருக்கு குடும்பத்தைவிட்டு வெளியூரோ அல்லது வெளிநாடோ செல்லக்கூடிய வாய்ப்பு உண்டாகும். அக்டோபர், நவம்பர் மாதங்களில் உங்கள் குழந்தைகளின் நலம் பாதிக்கப்படக்கூடிய வாய்ப்புகள் இருக்கின்றன. அக்டோபர், நவம்பர் மாதங்களில் குருவும், சுக்கிரனும் சேர்ந்து சுக்கிரனின் வீட்டில் இருப்பதால், களத்திரத்துடன் இருந்த பிணக்குகள் மறைந்து ஒற்றுமை உண்டாகும். செவ்வாயின் சஞ்சாரத்தை வைத்துப் பார்க்கும்போது நீங்கள் உங்கள் பிரச்னைகளை மிக்க துணிவோடு எதிர்கொள்வீர்கள்.

2018 பிறந்த பிறகு, சனியின் சஞ்சாரத்தை வைத்துப் பார்க்கும்போது குடும்பத்தில் அமைதியின்மை காணப்படுகிறது. சனியானவர் 7-க்கு உடையவராகி 6-ம் வீட்டில் இருக்கிறார் அல்லவா? ஆக, குடும்பத்தில் அமைதி குறைவாகவே காணப்படும். குழநதைப்பேறு இல்லாதவர்களுக்கு மகப்பேறு கிட்டும் பாக்கியம் 2018-ல் காணப்படுகிறது. தொழில் நிமித்தமாக வெளிநாடோ அல்லது வெளியூரோ சென்றிருப்பவர்களுக்கு உள்ளூர் திரும்பும் யோகம் காணப்படுகிறது.

திருமணம் ஆகாத இளம் வயதினருக்கு இந்த ஆண்டு திருமண யோகம் காத்து இருக்கிறது. புதுமனை வாங்க விழைவோருக்கு 2018-ம் ஆண்டு நன்மை தரும் ஆண்டாகவே இருக்கிறது. சிலருக்கு உத்தியோகத்தில் மாற்றம் ஏற்படும் சூழ்நிலை 2018-ம் ஆண்டு உண்டாகும். மார்ச், ஏப்ரல் மாதங்களில் வியாபாரத்தில் இருப்போருக்கு நல்ல முன்னேற்ரம் காணப்படும். வியாபாரம் விருத்தியாகும். அதனால் லாபமும் கூடும்.

படிக்கும் மாணவர்களுக்கு மார்ச், ஏப்ரல் மாதங்கள் நன்மையைத் தரும் மாதமாகவே காணப்படுகிறது. படிப்பில் முன்னேற்றம் காணப்படும். சித்திரை மாதத்தில் சூரியன் உச்சம் பெறுகிறார். அதனுடன் சுக்கிரனும் சேர்ந்துகொள்கிறார். குரு பார்வை வேறு. பலவிதங்களிலும் நன்மையை இந்த ராசிக்காரர் பெறுவது உறுதி.

Next Post